റോം : വിശ്വാസത്തിന്റെയും പാരമ്പര്യത്തിന്റെയും ആഗോള ഐക്യത്തിന്റെയും പുതിയ അധ്യായം രചിച്ചുകൊണ്ട് സീറോ മലബാര്‍ സഭയുടെ ഔദ്യോഗിക അല്‍മായ സംഘടനയായ കത്തോലിക്ക കോണ്‍ഗ്രസിന്റെ ആഗോള സമ്മേളനത്തിന് ഇറ്റാലിയന്‍ തലസ്ഥാനമായ റോമില്‍ പ്രൗഢോജ്ജ്വല തുടക്കം.
ഒക്ടോബര്‍ 19 മുതല്‍ 23 വരെ റോമിലെ മാറ്റര്‍ എക്ളേസിയേ (Mater Ecclesiae) യില്‍ നടക്കുന്ന സമ്മേളനത്തില്‍ ലോകത്തിന്റെ വിവിധ ഭൂഖണ്ഡങ്ങളിലെ 40 രാജ്യങ്ങളില്‍നിന്നുള്ള പ്രതിനിധികളാണ് പങ്കെടുക്കുന്നത്. ലിയോ പതിനാലാമന്‍ മാര്‍പാപ്പയുടെ ആശീര്‍വാദം തേടിയും ആഗോള കത്തോലിക്കാ സമൂഹത്തിന്റെ ഐക്യസന്ദേശം ഉയര്‍ത്തിപ്പിടിച്ചുമാണ് സമ്മേളനം സംഘടിപ്പിച്ചിരിക്കുന്നത്.
സഭാ മേലധ്യക്ഷന്മാരുടെയും പ്രമുഖരുടെയും സാന്നിധ്യത്തില്‍ ഉദ്ഘാടനം
ഒക്ടോബര്‍ 20~ന് നടന്ന ഉദ്ഘാടന സമ്മേളനം സഭാനേതൃത്വത്തിന്റെയും അല്‍മായ പ്രതിനിധികളുടെയും സജീവ സാന്നിധ്യംകൊണ്ട് ശ്രദ്ധേയമായി.
സീറോ മലബാര്‍ സഭയുടെ മേജര്‍ ആര്‍ച്ച് ബിഷപ്പ് മാര്‍ റാഫേല്‍ തട്ടില്‍, കത്തോലിക്ക കോണ്‍ഗ്രസ് ബിഷപ്പ് ലെഗേറ്റ് മാര്‍ റെമീജിയൂസ് ഇഞ്ചനാനിയില്‍, ഗള്‍ഫ് രാജ്യങ്ങളിലെ അപ്പസ്തോലിക വിസിറ്റേറ്റര്‍ മോണ്‍സിഞ്ഞോര്‍ ജോളി വടക്കന്‍ എന്നിവരുള്‍പ്പെടെയുള്ള സഭാ മേലധ്യക്ഷന്മാരുടെ സാന്നിധ്യം സമ്മേളനത്തിന് ആത്മീയ പ്രാധാന്യം പകര്‍ന്നു.
ഉദ്ഘാടന സമ്മേളനത്തോടനുബന്ധിച്ച് വൈകുന്നേരം വര്‍ണ്ണാഭമായ സാംസ്കാരിക പരിപാടികളും അരങ്ങേറി. ലോകത്തിന്റെ വിവിധ ഭാഗങ്ങളില്‍ നിന്നുള്ള പ്രവാസി മലയാളികളുടെ സജീവ പങ്കാളിത്തം ചടങ്ങിന് മാറ്റുകൂട്ടി. ജര്‍മനിയില്‍ നിന്ന് ജോളി തടത്തില്‍, മേഴ്സി തടത്തില്‍, അമേരിക്കയിലെ ന്യൂയോര്‍ക്കില്‍ നിന്നും ചിക്കാഗോ രൂപത പാസ്റററല്‍ കൗണ്‍സില്‍ സെക്രട്ടറിയുമായ ഷോളി കുമ്പിളുവേലിയുള്‍പ്പെടെയുള്ള പ്രമുഖര്‍ സംബന്ധിച്ചു. കൂടാതെ റോമിലെ സാമൂഹ്യ സാംസ്കാരിക സംഘടന പ്രവര്‍ത്തകനും മാധ്യമ പ്രവര്‍ത്തകനുമായ പ്രൊഫ. ജോസ് ഫിലിപ്പ് വട്ടക്കോട്ടയിലും സമ്മേളനത്തില്‍ സജീവമായി പങ്കെടുത്ത് സാന്നിധ്യമറിയിച്ചു.
കത്തോലിക്ക കോണ്‍ഗ്രസ് ഗ്ളോബല്‍ പ്രസിഡന്റ് പ്രൊഫ. രാജീവ് കൊച്ചുപറമ്പില്‍, ഗ്ളോബല്‍ ഡയറക്ടര്‍ റവ. ഫാ. ഡോ. ഫിലിപ്പ് കവിയില്‍, ഗ്ളോബല്‍ ജനറല്‍ സെക്രട്ടറി ഡോ. ജോസുകുട്ടി ജെ. ഒഴുകയില്‍, ജനറല്‍ കണ്‍വീനര്‍ ബെന്നി പുളിക്കക്കര തുടങ്ങിയ സംഘടനാ നേതാക്കളും സമ്മേളനത്തിന് നേതൃത്വം നല്‍കി.
കേരളത്തില്‍നിന്നുള്ള ജനപ്രതിനിധികളായ മോന്‍സ് ജോസഫ്, അപു ജോണ്‍ എന്നിവരുള്‍പ്പെടെ സാമൂഹിക, സാംസ്കാരിക, പൊതുപ്രവര്‍ത്തന മേഖലകളിലെ പ്രമുഖ വ്യക്തിത്വങ്ങളും സമ്മേളനത്തില്‍ സന്നിഹിതരായിരുന്നു.
Comments: